02/05/2022.- La programación del circuitu de cultura tradicional d’Asturies, Cultura en Rede hasta xunu incluye proyectos de divulgación de la historia, l’arqueoloxía, el patrimoniu y la cultura popular asturiana al traviés de conferencies, cuntacuentos o música.

Laura Iglesia va falar sobre Los reyes asturianos nuna conferencia teatralizada en Llanera y Noreña; Educa y Cine, sobre patrimoniu audiovisual en Lumière por Asturias en Balmonte de Miranda; y Cuatro Gotes Producciones va ufiertar una conferencia sobre la historia de la llingua asturiana en Carreño y Bimenes, y sobre la toponimia en Colunga. Sergio Buelga va repasar Un sieglu de teatru del pueblu: el Teatru Popular Asturianu en Carreño y va llevar xuegos tradicionales a La Ribera y Colunga con Xugando a la tarusa y Xugando al liriu.  

Tamién va haber cuentos, cantares y poemes con Restolando de David Varela en Nava, Navia y Llaviana; Cuentos de la Xana, el Trasgu, el Cuélebre y el Nuberu d’Elisabet Martín Teatro en Castrillón, Colunga y Noreña; Cantares y contares de Yheppa Títeres en Grau, Navia y Piloña; y cuentos tradicionales con Contábamelo la bruxa de Factoría Norte en Llanera, Navia y Ribeseya. Carlos Alba Cellero va llevar Dos oreyes y una boca a Balmonte de Miranda, Grau y Ḷḷena, y La matazuga a Muros de Nalón; y Aladanza Educación y Tradición, Baille cuentu a Candamu.

El repertoriu musical tradicional asturianu va mostrase al traviés de dellos formatos en Eso ye la de… d’El Arca de Mozart en Piloña; en Si Beethoven fuera asturianu d’Ensemble L’Arca en Navia; nos conciertos de Calea con Silvia Quesada, Ruben Bada y Leticia Baselgas en Llanes, A Veiga y Tinéu; o con Los Gascones en Ḷḷena. Amás, Leticia Baselgas va comentar la rellación ente la muyer, la pandera y la música tradicional asturiana na conferencia Ente’l punk y les ruxideres en Grau.

Nel marcu del circuitu de cultura tradicional d’Asturies, Cultura en Rede programáronse pal primer semestre del añu 70 eventos de 23 profesionales en 27 conceyos, con un presupuestu que supera los 49.000 euros. Esti circuitu forma parte d’Asturies, Cultura en Rede, un proyectu dela Conseyería de Cultura, Política Llingüística y Turismu, fechu en comuña colos conceyos asturianos y xestionáu pola Sociedad Pública de Xestión y Promoción Turística y Cultural del Principáu d’Asturies, onde tamién s’incluyen circuitos temáticos d’artes escéniques, música, artes visuales, Xacobéu, Autores Nel Camín, lliteratura y Cuadonga 2022 - Camín de los santuarios.

La información ampliada de la programación pue consultase na web asturiesculturaenrede.es.